سالفتي يوم امس السبت في الصناعية القديمة بالرياض والضحك

13 13

لايمكنك التصويت حتى الحصول على 20 نقطة على الأقل
إضغط هنا للإخفاء

ابو فرح مازدا 537
قبل 10 سنه

السلام عليكم ورحمة الله وبركاته 
بدايةً يا شباب بعطيكم المعلومات عشان تلمون بالموضوع
السيارة مرسيدس 2010 اس 350 لارج ( بانوراما ) اللون اسود لون سهل للبوية
فيها حكة بالباب الخلفي يمين مع الحرف اللي بين الباب والكفر 
الحل لازم تغيير الباب بواحد جديد لانه ما يتسمكر لانه المنيوم 

اول شي صحيت بدري من النوم الساعة 10 وقلنا بسم الله وواشغل السيارة واروح دانكن بالطريق واخذ قهوة كبير عشان امخمخ عليهم 
واروح اول ورشه المالكي حق المرسيدس قالي جيب باب جديد ويتفلسف الفلبيني قلت اوك بجيب باب من الجفالي كم تبون شغل اليد قالي 5000 قلت يمين يسار قالي نهائي قلت لا واطلع واروح ورشة خلفه قالي 4000 حق تركيب الباب مع سمكرة الخرف ورش الباب قلت تعوذ واخر كلام وكذا 3500
واروح الوفا على اسمه وسمعته  وهنا المصيبة باب جديد وحق الشغل 6500 ريال يقول لا تكلمني بقل من كذا قلت يبن الحلال انا ما جيت اشحذ منك واترجاك تصلحها لي من قالي اصلاً بدخلها عندك بس جيت ابي اعرف السعر الفلكي حقك عشان اكتبه في موقع حراج واضحك العالم عليك
 وانا اطلع قلت واروح ورشة ديزاين وانا وياه يمين ويسار 5000 وبعد المكاسر 4500 قلت تراها بوية باب مو سمكرة وشغل صناعة صاروخ واطلع

واروح ورشة الجودة عندهم مايباخ وسيارات صح وهنا المربط قلت بكم قالي 6000 وانا بجيب لك الباب طبعا الباب انا عارف سعرة 1700 بتشاليح الصناعية 
المهم وانا وياه قلت ابي الضمان قالي نضمنها لك قلت شوف بعطيك 10000 بس بشرط بطلع السيارة من عندك وبروح افحص عند البريدي واذا طلع لي شي في البدي بجي باخذ الفلوس حقتي والشغل بلاش والكلام هذا تكتبه لي بالفاتورة قام قالي لا يطلع عندك الرش 20% عرفت وقتها ان الشغل نصب في نصب 
المهم واروح اخذ الباب واسالهم عندكم ورشة قالي الفردوس هذي قريبه من الوفا قلت وصلي الباب هناك ويحملونه واروح معهم طبعا شبكت السوبر فايزر حقهم سعودي قلت بكم قالي انا قلت لك اول 2500 وهو كان قايلي 3500 وبعد المضارب 2000 قلت افزعلي باخذها مثل سعر الباب قال ابشر وش تبي بعد قلت الضمان قالي سنتين قالت ابي تلمع السيارة كاملة خارجي قال اوك قلت ادخل السيارة قال لا جيبها يوم الاثنين قلت حط الباب عندك عشان يمسك مكان للسيارة قال ماعليك ما دام هذا اللي جابك لا تشيل هم

طبعا الباب له سالفة بالسعر حصلته عن محلين واحد قالي 1700 واخلاقه في طرف خشمه ما ارتحت له وصاحبي قالي 2500 وانا مارهم قبل ثلاث اسابيع وهو قايلي 2200 قلت له انت قايلي كذا وعن جارك 1700 قالي تجاري قلت ورني العلامة حقت مرسيدس وجلس يقلب بالباب 10 دقايق يطلعها مكانها صعب قلت بشوف الباب الثاني واحصل العلامة في نفس المكان وارجع له قلت نفسه العلامة والارقام محفورة حفر نفس بابكم قالي 2000 قلت ياخي انا موقف السيارة عندكم ومن باب الادب بس اني باخذه منك وانا اصلا قرفان من تعامل الثاني قالي لا قلت 300 فرق انا اولا فيها وجيت اطلع قال دقيقة بكلم صاحب الحلال قلت اوك المهم اخذاه 1700 والحمد 

فعلا السيارة الغالية يذبحونك بالاسعار الفلكية 
وكلهم اهبلهم لاني مسعر السيارة في الجفالي وقالي الباب 7000 والشغل 3000 وكلهم اجلطهم اقوله انت مو صاير احسن من الجفالي بالشغل وهو طالب 3000 بس عارف ما راح بدخل السيارة اذا ما اخذت الباب منهم .

واسف ايها الاعضاء على طول الموضوع بس هذا للتنبيه الشباب 
السيارة حقت واحد من الشباب ولاهو فاضي لها وما يعرف شي غير الوكالة وانا اخذتها منه من باب الفزعة له.

إبلاغ

الردود