أضف سؤال أو موضوع جديد          

لعيون المرسيدس

up 43 down 11
dr maan 770
قبل 3 سنه و 6 شهر



اخر علمي بالفلوس وبالراحة يوم اشتريت المرسيدس.. قصه عجبتني الله يرحم الكاتب
قدر الله علي وشفت واحد من جيراننا من أهل الشام طالع في سيارة مرسيدس فياقرا مع زوجته وبزارينه..
السيارة كانت فضية تلمع والشامي هذا وزوجته وولده وبنته كلهم ما شاء الله تبارك الله حمران عطران..
تخيلت نفسي راكب في المرسيدس وطالع مع زوجتي نتمشى زيهم وناكل كبة مقلبة وطعمية وزعتر في حدا المنتزهات..
نسيت اقول لكم اني من يوم كنت في ثالث ابتدائي وانا أمنيتي اني اصير شامي
بدا الحلم يراودني ليل نهار وصرت اسج واسرح في العمل وفي البيت وحتى وانا اسوق الونيت كنت باصدم كم مرة لأني أسرع أكثر من اللازم لأني اتخيل اني أسوق مرسيدس..
**
بديت أحسب الموضوع من الناحية المادية..
الونيت يسوى عشرين ألف، وعندي كم قرش في البنك باسحبهم، وبيجيني الراتب آخر الشهر، والمناخ بيطلع لي بعد شهرين، وعندي انتداب يمكن يصرف لي بعد ثلاثة أشهر..
إلى الحين وانا اهوجس بيني وبين نفسي كل يوم وما كلمت جارنا الشامي ولا أدري هو بيبيع المرسيدس والا لا..ولا أدري حتى كم موديل المرسيدس ولا كم يسوى في السوق ولا وش مواصفاته..ولكن اهم شي عندي اني اركب فيه مثل الشامي وعياله يمكن في يوم من الايام اصير حمر عطر مثلهم




مرت الأيام وتجمعت الفلوس عندي وصار رصيدي في البنك عشرين مع قيمة الددسن إذا بعته يصير عندي اربعين الف
تجرأت وكلمت الشامي بعد صلاة العصر..
قلت له وحنا طالعين من الصلاة: ابو وسيم المرسيدس للبيع؟
قال لي: ما فيه شي محرم على البيع؟
قلت: كم موديله؟
قال: تسعة تسعين
قلت: يعني عشر سنين وهو يكد
قال: بالنسبة للمرسيدس هذا تمرين بس
قلت: وبكم؟
قال: ما بابيع بأقل من خمسين ألف.
قلت: ما تاخذ مقاطيع؟
قال: شو مقاطيع؟
قلت: ددسن وعشرين الف
قال لا. بدي فلوس بس
قلت: تبيع باربعين؟
قال: اقل من خمسين بريال واحد ما بابيع، والسيارة نظيفة وتعال معي جربها عشان تتطمن.
الحقيقة اني كان بيغمى علي يوم قال لي تعال جربها.
***
ركبت السيارة وكانت اول مرة اركب مرسيدس من الله خلقني..
السيارة كبيرة وكلها جلد وخشب وازرار مدري وش هي له، وريحتها عطر على كبة مقلية على قهوة سوداء على ميرمية..
شغلت السيارة وتمشيت فيها شوي في الحارة وقلت لصاحبها خلاص انزل شريت
قال لي ما تاخذ السيارة لحد ما تجيب الفلوس
قلت الفلوس بكرة تكون عندك
قال: لا جيب الفلوس ونروح للمعارض وانقل السيارة باسمك..
بديت اجهز نفسي جمعت فلوسي في الحساب وتسلفت كم الف وبعت الددسن على واحد من الربع بعشرين الف بشرط يصبر علي الين اشتري المرسيدس
ويوم دبرت الفلوس رحت للشامي وقلت له يا الله هذي الفلوس وخلنا نروح للمعارض
رحنا للمعارض لمعرض واحد يعرفه واكتشفت في المعرض ان الاستمارة مطوفة ولازم فحص دوري جديد ولازم تأمين جديد وحق المعرض خمس مئة ريال
والمهم بديت ادبر الفلوس من هنا ومن هنا وفحصت السيارة وطلع فيها كم شي لازم يتصلح قبل الفحص عشان تنجح في الفحص مثل وزن اذرعة وبعض اللمبات والفرامل والكربون
والحسابة بتحسب..
وأمنت ودفعت قيمة الاستمارة وتغيير اللوحة وفي النهاية وبعد اسبوعين يمكن صارت السيارة باسمي
أخيرا ركبت السيارة وطلعت من المعرض ورحت للبيت وماني مصدق انه صار معي مرسيدس فياقرا
كل من شافني ما صديق واللي يقول اني صرت سواق شيوخ واللي يقول صرت شامي واللي يقول الله يهديك ليش شريتها
وكل واحد له راي 




*




الفياغرا معقدة وكل يوم يطلع لك رسالة من الكمبيوتر افحص كذا وشيك على كذا وباقي على الفحص 2000 كيلو متر
وأكثر الأزرار ما اعرف فايدتها وكل يومين اتصل على ابو وسيم أو أروح له البيت عشان يشرح لي شي في السيارة
واذا دخلت الصناعية لازم اروح ورش معينة وأسعارهم وأسعار القطع غالية جدا جدا
وبعدين ما عندي قراش اوقف الفياغرا فيه وكل وقتها في الشمس وصرت اتهاوش مع الجيران على الظلال واوقف تحا اشجارهم وجدرانهم وكل يوم واحد كاتب لي رسالة: يا صاحب الفياقرا لا تزقف هنا والا ترى باكسر قزاز سيارتك 
وواحد يكتب ترى بافقع كفراتك لو وقفت هنا يا راعي الددسن سابقا
كل هذا من الحسد والغيرة وانا ورطان وباحل بنفسي وبها السيارة
**
اكتشفت ان السيارة عزمها ضعيف قالوا لي لازم تغير بواجي ويوم رحت اشتري بواجي اكتشفت ان الفياقرا فيها 12 بوجي وكل واحد قيمته 30 ريال وعليك الحساب
غيرت زيت المكينة بمئتين ريال وغيرت زيت القير مع الفلاتر بسبع مئة ريال
وكل يوم مصاريف جديدة وكل كم يوم يطلع لي واحد يقول عندنا زواج وابغى اكشخ في الفياجرا، أو يكون هو العريس وياخذها وبعد الزواج يقفل جواله
أو يجيني واحد يقول باطلع خويتي وابغى سيارة كشخة وفي النهاية أكتشف انه يوصل ركاب طريق القصيم
والمشكلة بقيت زي ما انا لا صرت وسيم ولا احمر عطر ولا يحزنون وزوجتي زي ماهي وكل ما ركبت الفياقرا صكت على عبايتها وصارت تسحب في الشارع والناس يشرون لي عشان انتبه واحسبهم معجبين بالفياقرا أو يبغون يحتكون معي وفي النهاية نوصل البيت وعبايتها متقطعة
مر كم شهر وجاء الصيف واكتشفت ان المكيف عطلان ومن ورشة لورشة وفي النهاية بعد كم الف اشتغل المكيف لكن شغل أي كلام ومراتب الجلد لونها اسود ويبغى لها كم ساعة عشان تبرد وفي النهاية افتح القزاز ارحم لي من الحر 
مرت سنة وقررت احط حد للمصاريف والدوخة ورحت لابو وسيم وقلت له تشتري الفياقرا؟
قال: كم حدك؟
قلت له: براسمالها
قال: لا كثير
قلت له: يا قليل الحيا يوم جيت اشتريها منك ما طرحت لي ولا ريال من الخمسين الف والحين تقول كثير




***
باختصار شديد
بعت السيارة على ابو وسيم بثلاثين الف ومن يوم اشتراها ما عاد خربت ولا راحت للورشة
ما ادري هل المرسيدس والبي ام سيارات المانية والا شامية؟
خذت الفلوس ورحت للي شرى ددسني وشريته منه وكسبته الف ريال وارتحت نفسيا لكن ام العيال والعيال مازالوا يحبون المرسيدس




وتبت من السيارات الفخمة
لكن بعد سنتين لقيت ابو وسيم معه رنج روفر كحلي ورقم لوحة مميز
وانا احب الجيوب ويوم شفته انهبلت وطار عقلي
قلت له للبيع؟
قال: قلت لك من زمان ما في شي محرم على البيع يا ابو راشد
قلت : تبادلني بالددسن؟
قال : نصيبك
قلت: بشرط إذا مليت من الرنج ترجع لي ددسني
قال: ما في مشكلة
ورجعت حليمة لعادتها القديمة كل يوم ورش ومشاكل ورحت ادور ابو وسيم قالوا لي نقل من الشقة
واللي يعرف فيكم ابو وسيم يدلني على شقته واعطيه الرنج هدية لأني بس ابغى افقع وجهه
قصه منقوله عجبتني







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


قصه جميله ،،،

مفادها ي بو راشد مد رجولك على قد لحافك،،،


up 12 down 1
panamira 1889
قبل 3 سنه و 6 شهر



ههههههههههههههههه . الله يسعدك ضحكت من قلب


up 4 down 1
مهراس الزهراني 1327
قبل 3 سنه و 6 شهر



هذا اللي مستغرب منه ماتخرب مع الاجانب بس يوم تستلمها 
تخرب صدقني هذي من الورش حقت مرسيدس اغلبهم سرقه قطع الا من رحم ربي


up 3 down 6
i6rb_ 163
قبل 3 سنه و 6 شهر



ي طويل العمر والسلامه مافي شي اسمه موتر ورش
فيه شي اسمه استخدام انت معطي موترك حقه بيمشي
صيانه اول باول وورشه مزبوطه وتوكل ع الله 
الالماني عز م بعده عز من المواتر وانا استخدمت الشبح12سلندر
موتر صدق م بعده موتر واستخدمت 500 فياقرا موتر لاقالوا موتر


up 5 down 5
شبح 600 sel 6079
قبل 3 سنه و 6 شهر



هههههههههههههه
كان اختصارها صاحب الموضوع
بدل المرسيدس
تزوج شاميه وددسن باقي عنده 
ع الاقل لاخساير ولا ورش


up 5 down 3
س ي ف 161
قبل 3 سنه و 6 شهر



الشامي تحصله يستخدم مرسيدس من زماان ويعرف طريقة استخدام السيارة ويعرف كيف يحافظ بالسيارة وسلامتكم


up 3 down 4
majid__120 410
قبل 3 سنه و 6 شهر



ههههههههههه اهم شيء الي كتبله لا توقف يا راعي الددسن سابقا


up 8 down 1
عاشق القهوة 526
قبل 3 سنه و 6 شهر



ارْضَ بِمَا قَسَمَ اللهُ لَكَ تَكُنْ أَغْنَى النَّاسِ ، وأهم شيء الأخلاق وليست المظاهر


up 5 down 1
عمده33 1652
قبل 3 سنه و 6 شهر



هههههههههههههه جميله القصه
اخوي توه فاك له مرسدس من الامارات  بلوح امارتيه 

وارد يباني وارسلت له القصه 


up 3 down 1
أبوتـركي 752
قبل 3 سنه و 6 شهر



ماقد شفت بنز نضيف مع شامي جاله من السماء ابو راشد هههههه


up 1 down 5
يارب توفيقك 2014 1663
قبل 3 سنه و 6 شهر



السالفه فيها كميه من المبالغه عجيبه ..


up 2 down 9
ابوناصر 454 657
قبل 3 سنه و 6 شهر



المرسيدس ما تعرف أبو وسيم ولا أبو مشعل ولا أبو شريف
المرسيدس ما تعرف غير اللى يحافظ عليها 
ومن يحترمها تحترمه ومن يهنها تهينه (فى الاستخدام طبعاً)
عندى خالى معه مرسيدس موديل ٧٨ مطلعها وكااااااله أصفار ولسه معه حتى وقتنا هذا
قسماً بالله تركب السياره من جمالها ونظافتها ترتاح نفسياً ماشاء الله
مره سألته يا خال كيف محافظ على سيارتك فوق الثلاثين سنه قال لى
يا ولدى السيارات دى زى الزوجه تحترمها تعطيك وتهينها ترزيك
وأنا واخدها بكر وطول عمرى باحترمها وما بابيعها إلا يبيعونها الورثه


up 3 down 4
abu-salma 304
قبل 3 سنه و 6 شهر



اضحك الله سنك ي شيخ اضحكتني صراحه ^^


up 1 down 4
zzrrsszz 25
قبل 3 سنه و 6 شهر





شكرًا لك قصه جميله ،،،،، 


up 2 down 1
بن حمد s 41
قبل 3 سنه و 6 شهر



اشكرك على القصة الجميلة


up 1 down 1
الكحلي 36
قبل 3 سنه و 6 شهر



قصه تمثل بعض الشباب اليوم ياخذ موتر فخم ما يقدر على صيانته

ويبتلش ويذم بالسياره واخر شيء يرجع للددسن ههههههه


up 2 down 1
abomesal 1033
قبل 3 سنه و 6 شهر



المشكلة معظم الشباب اليوم اخر شي يفكر فيه السيارة
يعني يركب المرسيدس ويدخل فيها فيها جميع الحفر والمطبات بسرعة كبيرة
واذا تعطلت معاه قام يسب ويشتم بالسيارة
ياخي انت سواقتك زفت تذم في السيارة ليش
ذم نفسك اول بعدين تعال تكلم
تلاقيه متعود على الددسن وييجي يسوي بالسيارات الفخمة نفس الشي
مشكور على القصة الاكثر من رائعة



up 0 down 2
moathyaseen 1391
قبل 3 سنه و 6 شهر



اذا الفياغرا موديلها 99 وعشر سنوات تكد يعني القصة من 2009 ميلادي 


اضحك الله سنك وفعلا المرسيدس لها عندنا معزة خاصة ولكن الزمن اختلف وتغيرت نظرة الناس 
واتجهنا كالجميع لهيونداي وكيا :) 

الله يرزق الجميع 


up 0 down 0
a m i r 553
قبل 3 سنه و 6 شهر