استفسار عن صيانة واسعار قطع جيب مرسيدس G500 موديل 2004

مرسيدس وبي ام اشترها اذا جيبك دافي وعندك سياره بديله
واذا انت على قد حالك انصحك ابعد منها

والله نصيحة اخ ابتعد عنها ثقيلة وغثيثة الموتر هذا اذا ماهو G55 سوبر تشارج يصير كلبي جداااا والحين الناس طبو فيه وقضو اصبح مستهلك وقاسي بالقيادة مرة وعزل الهواء صفر

حياك الله اخوي عاشق البنز اشوفك من اكثر الأشخاص مشاركة وتفاعل وان شاء الله انك لك الخبرة وبتفيدني

اكيد G55 يفرق لكن السوبر تشاجر متخوف منه ولا ابيه
وانا اللي شدني في مكينه ٥٠٠ بعض الاسعار اللي سمعتها من ناحيه القطع وبعد ان المكينه تأخذها مجدده ما بين سعر ١٠٠٠ الى ١٥٠٠ ونفس الشي مع القير
( الصدق بعض الكلام حسسني انه كرسيدا من ناحية انه عملي )
ومثل المساعدات تركب طقم جبريال وترتاح لكن اجهل باقي الاشياء من ناحية عضلات والى اخره

ومن ناحية ثقل وغثاثه وقساوة وعزل تعبان ما يهمني كثير الصيانة والاعطال

اتمنى اللي عنده خلفيه ينورنا وما يبخل بالرد

حبيبي انا املك الخبره الكافيه وحاب افيدك بشغلتين بالجي كلاس
الجي كلاس اللي تاخذه موديل 95 نفس اللي تاخذه 2007 جي500 غالبا محركاتها شبح وفياقراا
صحيح قطعها تعتبر اقل توفير من الموديلات الحديثه بس المكينه المجدده مثلا غير صحيح انها 1500 الشبح وهي شبح ماتنزل عن 2000 وهي موضبه طبعا 2004 وفوق بيكون مكينه فياقرا وسعرها يتراوح من 3000 الى 4000 حسب نظافتها وممشاها والقير من 2000 الى 2500 قبل ماتشتري تااكد من شيئين مهمين بعد المكينه والقير وهو عمود الدبل والكهرباء لان اذا ماكانت في المستوى راح تتعب كثير وبتكون زبون دايم عند اخوانا السوريين المتخصصين بالمرسيدس
بالمختصر المفيد كل شي فيه حلو ومقدور عليه
لكن كمبيوتراته وكهربته بتتعبك اذا اهملتها او ماشيكت عليها من البدايه تحياتي لك

من واقع تجربه اشتريت ٢٠٠٢ مخزن وكان يحتاج لبعض القطع الاستهلاكية وجدتها في جده غالية وطلبتها عن طريق النت من الامارات نصف السعر

احتجت مساعدات تنصحوني بمساعدات الربع وماشاء الله ١٠٠%
احتجت قربة مويه اللديتر وجدت حقت الفياجرا قيمتها ١٠٠ ريال
اشتريت من الامارات عدادات السرعة حق موديل ٢٠١٣ ب٨٠٠ ريال

السيارة امانه ممتعة في قيادتها